في تاريخ 10 سبتمبر 1945م اشتهى مربي دجاج اسمه لويد أولسن وزوجته كلارا يتغدون كبسة دجاج .. فدخلوا لمزرعة الدجاج الي عندهم ومسكولهم كم دجاجه وكم ديك عشان يذبحونهم وقالوا نطبخ من الي ذبحناه غدانا والزايد نبي نبيعه ..
وكان عندهم ديك حبيب يحبونه بالحيل يسمونه "مايك" .. فقالوا هالديك عشانه حبيب ونحبه كثير نبي نذبحه ونخليه لغدانا محنب بايعينه لاحد ..
ويوم جا دور ذبح ونتف ريش ديكهم الحبيب "مايك" مسكه "لويد" مع رقبته ثم قال به .. ولكن لويد الحول سدد لرقبة الديك "مايك" ضربه خاطئه ما قطعت راسه لكن قطعت جزء من راسه .. وقعد مايك الضعيف حي باذن وحده وما انقطع الودج ( والودج ذا مدري وشو اسألوا الدكاتره عنه بس هي السالفة تقول كذا ) ويقولكم انه بقي جزء كبير من الحبل الشوكي سليم وما به الا العافيه ..
مايك بصورة تذكاريه له مع راسه 
الله لا يجعل لويد الحول ينفذ حكم قصاص باحد قولوا آمين ..
ومع ان مايك طيرله لويد ثلاث ارباع راسه الا انه ما زال قادر على القفز والمشي بطريقه متعثره وما مات!
مايك قاعد يقفز ويتعثر ويمارس حياته الطبيعيه من غير راس
ولما لاحظ الحول لويد ان ديكه الحبيب مايك حي وما مات قرر اللوح يعتني به ويخليه يتعذب ويعيش بربع راس وكان يشربه مزيج من الحليب والماء ويزرطه حب صغير من الذرة مع فتحة ظاهره برقبته .. يقالك مسوي به خير يعني الحين ..
الله يخلف على ام(ن) جابته بس!
المهم بدت سالفة ذا الديك تنتشر بامريكا والكثير ما اخذها على محمل الجد واعتقد انها مجرد اشاعه .. فأخذ لويد أولسن ديكه المقطوع الرأس لجامعة يوتا عشان يثبت للجميع صحة الأخبار الي راجت حول الديك مقطوع العنق في مدينة سالت لاك حيث جرت الحادثه ..
لويد ومايك وراس مايك ونظرة مستقبليه مشرقه نحو مستقبل مشرق
كان وزن "مايك" يوم طيّر لويد ثلاث ارباع راسه 2 باوند ونص يعني تقريباً 1 كيلوغرام
ويوم مات "مايك" وصل وزنه الى 8 باوند يعني تقريباً 3 كيلوغرام ونص
والحين بتشوفون صورة "مايك" وهو قاعد ياكل غداه اللذيذ من فتحه برقبته ( الحمدلله الذي عافانا مما ابتلاهم به وفضلنا على كثير من خلقه تفضيلا ) ..
والي قاعد يأكله الدكتور لويد أولسن .. ما ناقصه الا شهادة الطب على ذا الصورة 
والجدير بالذكر ان الديك "مايك" ( تعذب حي ) من غير راس 18 شهر كاملين!
صحيح ان لويد لوح والمفروض انه ذبح الديك في لحظتها ولا تركه يتعذب حي 18 شهر كاملين من غير راس عشان يكشخ به ويصير مشهور لكن نستشهد ايضاُ على الي صار
بقوله تعالى : لن تموت نفساً حتى تستكمل رزقها وآجلها ..
والحين الديك مايك يتسواله احتفال سنوي في امريكا وتم تخليد ذكراه بنصب تذكاري شُيّد له مدري وين بامريكا بس الظاهر بمدينة سالت لاك مسقط رقبة "مايك" ( ما عاد له راس ) بالإضافة الى واحد فلوسه زايده سواله موقع الكتروني بتلقون فيها سالفة لويد وديكه مع بعض الصور بالإضافة إلى متابعة دائمه للاحتقال السنوي الي يقام بمناسبة ان لويد حول وما يعرف يذبح ديك!
هذا هو الموقع للي حاب يزوره : http://www.miketheheadlesschicken.org/index.html
واسمه : Mike The Headless Chicken
